Димитров во Белград на „Отворен Балкан“, фокусот на дигиталната трансформација за регионална интеграција

Во Белград нова средба во рамки на иницијативата „Отворен Балкан“, на која учествуваат српскиот претседател Вучиќ, албанскиот премиер Рама и македонскиот вицепремиер за евроинтеграции Димитров.

На последната средба во Скопје во јули, беше ставен потпис на договори за слободен проток на стоки, укинување на работните дозволи и соработка за заштита од природни катастрофи. Целта е од 2023-та практично да се укинат границите меѓу трите држави.

Вицепремиерот Димитров вели дека регионалната соработка има исклучителна важност за остварување на заедничките стратегиски определби на кои владата е посветена, без оглед на политичката ситуација.

„Доаѓам со порака дека регионалната соработка е апсолутно европска приказна, дека сакаме да продолжиме да ја продлабочуваме. Додаваме еден важен сегмент утре – како дигитализацијата може да ни помогне за да ја забрзаме и продлабочиме регионалната соработка“, изјави вчера Димитров при пристигнувањето во Белград.

Доаѓам во момент, додаде Димитров, кога како што знаете, во нашата земја завршија локални избори, има извесни политички предизвици, а и политичка криза на некој начин. Важно е да дадеме сигнал дека како Влада, како држава, сме целосно посветени на оваа иницијатива што се роди на Балканот и чија што цел првенствено е европски Балкан, истакна Димитров.

Предвидени се лидерски средби со претседателот на Србија, Александар Вучиќ и премиерот на Албанија, Еди Рама, како и со претставници на компаниите од трите земји кои учествуваат во оваа платформа за унапредување на регионалната соработка во контекст на европската интеграција.