Од денеска пријавување за вакцинација против сезонски грип
Од денеска пријавување за вакцинација против сезонски грип преку „вакцинација.мк“. Министерството за здравство набави 40 илјади дози четиритипни вакцини, но сѐ уште е неизвесно кога ќе пристигнат. За старите лица над 65 години, хронично болните, здравствени работници, бремените жени и за децата до 5 години, ќе бидат бесплатни...
Започна пријавување за вакцинација од сезонски грип. Граѓаните можат да се пријават преку страницата „вакцинација.мк“. Со тоа се рагистрираат за имунизација директно во системот Мој термин и согласно распоредот предвиден во планот за вакцинација по пат на СМС ќе добијат информација за точниот датум и час кога треба да се вакцинираат на пунктот кој ќе го изберат при регистрација.
Министерството за здравство и оваа година набави 40.000 дози четиритипни вакцини против сезонски грип. Веќе трета година по ред вакцината е бесплатна за стари лица (над 65 години), лица со хронични заболувања, здравствени работници, бремени жени, децата на возраст од 6 месеци до 5 години.
Од Министерството за здравство велат дека поради зголемената побарувачка на вакцини против грип на глобално ниво, се прават напори количините на вакцини да пристигнат во што побрз рок. Нагласувајќи дека не е доцна, граѓаните да се вакцинираат против грип во ноември или декември, бидејќи согласно епидемиолошките податоци, оваа болест во последните десетина сезони го достигнува пикот кон крајот на месец февруари.
Интересот за вакцинација секоја година е сѐ поголем. Од Министерството за здравство велат иако вакцинацијата за сезонски грип не штити од Ковид- 19 е многу значајна во услови на пандемија и влијанието врз здравственот систем.
Ана Јосифоска Тодоровска