МИОА: Регионалната интероперабилност е важен чекор кон интеграцијата во ЕУ

Министерството за информатичко општество и администрација прави подготовки за почеток на имплементација на системот кој овозможува регионална интероперабилност со земјите од Западен Балкан, како чекор кон подобра интеграција со земјите од регионот и кон ЕУ.

Како дел од овој процес, од суштинско значење е да се вклучат и компании кои работат во софтверската индустрија како дел од дигиталната трансформација, при што ни помогнаа експерти на Атлантскиот совет во обид да продолжиме со дигиталната трансформација што е можно поскоро.

Ги забрзуваме напорите за поголема стапка на раст, побрз економски развој, затоа што заостануваме зад развиените европски земји и мораме да направиме се што можеме за да им олесниме на нашите граѓани да напредуваат и да го подобриме животот на нашите граѓани- велат од МИОА.

Заложбата за подобра регионална интеграција и развој на регионалната платформа за интероперабилност беше разговарана и на Отворениот балкански самит, одржан оваa недела, каде дел е и нашата држава.

На следниот состанок во декември, кој ќе се одржи во Тирана, со соседните земји ќе разговараме за модалитетите и имплементацијата на оваа платформа, од која директна корист ќе имаат нашите граѓани и бизниси.