Владата решава за енергетската кризна состојба

На владина седница одлуката за прогласување енергетска кризна состојба, но според најавите, без рестрикции. Надлежните тврдат дека засега кризата е под контрола. РЕК Битола повторно е во погон. Отстранет дефектот на блокот еден, а блокот два до крајот на неделата треба да биде приклучен во мрежата.

Најавена е прес- конференција на министерот за економија Крешник Бектеши. Тој претходно соопшти дека има средства за да се интервенира, а во зависност од тоа колкави се потребите на енергетските компании, толку средства ќе бидат пренасочени директно од Буџетот.

Владата на 30-ти октомври донесе Уредба за прогласување кризна состојба при недостиг на електрична енергија, а како што објаснија тогаш од Министерството за економија таа е донесена со цел нејзино усогласување со одредбите на Законот за енергетика.

Во опфатот на оваа Уредба, како што информираа од ресорното Министерство, се определени и правата и обврските на учесниците на пазарот во услови на кризна состојба и се вклучени сите учесници на пазарот, а не како претходно само државните енергетски компании.

Прогласување кризна состојба во енергетскиот сектор неодамна побара и бизнис заедницата.