Интересот за вакцинација против сезонски грип е голем, нема метеж на пунктовите

Без гужви и метежи на вакциналните пунктови тече имунизацијата против сезонскиот грип. Граѓаните го почитуваат закажаниот термин што го добија преку „вакцинација.мк“. Интересот и годинава е голем, досега се пријавиле 26.000 граѓани. Оние кои дојдоа во поликлиниките се убедени дека вакцината ќе ги заштити од грипот, некои од нив имаат примено и трета бустер доза против Ковид- 19.

Докторите велат, предност за вакцинирање против сезонскиот грип имаат граѓаните над 65 години, со хронични респираторни заболувања, срцеви и други болести, трудниците и здравствените работници.

Според доктор Ралева, вакцините се единствениот начин за да се заштитиме од вирусите. Според последните препораки, нема никаков ризик ако во исто време се примат вакцината против ковид и против сезонскиот грип.

Граѓаните што не спаѓаат во ризичните групи, и на кои не им следи бесплатна вакцина, може да се имунизираат со комерцијалните вакцини за кои ќе треба да платат 800 денари. Вакцинацијата ќе се одвива во поликлиниките Бит Пазар и во Идадија, а во Ѓорче Петров ќе се одвива само во втората смена. Во домовите за стари лица и во центрите за дијализа ќе има теренска вакцинација.

Викторија Милевска