Штипскиот совет заседава без изменети решенија
Советот на Општина Штип заседаваше без опозицијата и без измени на текстот на изјавите со придавката „Северна“, како што укажа надлежниот инспекторат. Ќе го почитуваме решението на Инспекторатот и ќе ги искористиме сите правни лекови, велат од ВМРО ДПМНЕ. Опозицијата со став дека денешните одлуки на Советот немаат правно дејство...
И покрај опомената на Инспекторатот за локална самоуправа дека свечените изјави на новите советници без придавката „Северна“ кои ги потпишаа советниците од ВМРО ДПМНЕ и Левица се спротивни на Уставот, штипскиот совет денес заседаваше без измена на текстот на изјавите и изгласа ребаланс на буџетот. Претседателката на Советот вели дека денешната седница била закажана пред инспекцискиот надзор.
Мнозинството во штипскиот совет и понатаму ги крши уставните и законските норми и сите одлуки на овој состав се ништовни, сметаат од советничката група на СДСМ кои денес не учествуваа во работата на советот.
Инспекторатот за локална самоуправа во рок од 15 дена ќе изврши повторен инспекциски надзор во Општина Штип за да утврди дали се отстранети недостатоците, односно дали изјавите на советниците се со придавката „Северна“.
Славица Величковска