Задолжителна вакцинација за здравствените работници, а за администрацијата вакцина, ПЦР-тест или потврда за прележан Ковид
Задолжителна вакцинација за здравствените работници, а за администрацијата вакцина, ПЦР-тест или потврда за прележан Ковид, ова се новите мерки за невакцинираните граѓани. Комисијата за заразни болести побара да стапат во сила 10 дена од донесувањето на владина седница. Филипче препорача институциите да назначат одговорно лице што ќе прави контроли на влез. Стопанската комора бара задолжителната вакцинација да важи и во приватниот сектор, што за Сојузот на стопански комори е неприфатливо...
Вакцината против Ковид-19 да биде задолжителна за здравствените работници, предлага Комисијата за заштита од заразни болести. Истата содржи и препорака - вработените во јавните инситуции и во локалната самоуправа да примат најмалку една доза на вакцина. Доколку не сакаат, на сопствен трошок да направат ПЦР тест или да приложат сертификат за прележана инфекција во последните 45 дена. Луѓето пак, кои поради здравствени причини не може да се вакцинираат треба да обезбедат потврда од лекар – специјалист.
По најавите за заострување на мерките реагираа и од Сојузот на синдикатите на Македонија. Оттаму велат дека вакцинацијата мора да биде резултат на лична определба на работниците и не смее да се спроведува со присила.
И Конфедерацијата на слободни синдикати тврдат дека мерките ги кршат човековите права. Од Стопанската комора побараа да се воведе задолжителната вакцинација и во приватниот сектор.
На овие реакции се огласи ресорното министерство. Велат дека истите мерки се веќе воведени во многу земји во Европа во услови кога се заканува нов силен Ковид бран. Целта е раст на процентот на имунизираните.