Владата утре ќе решава за новите мерки
Владата утре ќе решава за новите антиковид мерки. Кризниот штаб без заклучоци по предлогот на Комисијата, вработените во јавниот сектор и во здравството, доколку сакаат да одат на работа, бесплатно да се вакцинираат, или на своја сметка да се тестираат за ковид. Министерот Филипче со став, предлог- мерките ќе дадат резултат за одржување на стабилна епидемиолошка состојба и зголемен процент на имунизација...
Главниот кризен штаб не донесе заклучоци по однос на предлог- мерките на Комисијата за заштита од заразни болести. За нив ќе одлучува Владата на седница. Министерот Филипче на состанокот посочил дека мерките се издржани и ќе дадат резултат за релативно стабилна епидемиолошка состојба, но ќе го зголемат и опфатот на вакцинација.
Мерките предвидуваат задолжителна вакцинација на здравствените работници. Вработените во јавните инситуции, кога ќе одат на работа ќе треба да покажат потврда за примена најмалку една доза на вакцина, сертификат за прележа Ковид или на сопствен трошок да направат ПЦР тест.
Луѓето кои поради здравствени причини не може да се вакцинираат треба да обезбедат потврда од лекар – специјалист.
Од мрежата за спречување и заштита од дискриминација велат дека заострените мерки се неопходни и не претставуваат дискриминација, затоа што јавното здравје претставува легитимна цел.
Потребата за заострување на мерките, здравствените власти ја оправдуваат со анализите според кои болниците се полнат со невакцинирани пациенти на кои отпаѓаат 75 до 80 насто од хоспитализираните.
Поригорозни мерки досега воведоа Бугарија, Хрватска, Словенија, Грција, Австрија, Холандија и други европски земји.
Анита Димитријевска Велковска