Оддадена почит кон жртвите од трагичната несреќа во Бугарија
Посмртните останки на 45-темина загинати во автобуската несреќа во Бугарија со два авиона пристигнаа во земјава. Државниот врв и министри им оддадоа почит на меѓународниот аеродром Скопје…
По речиси едночасовното преземање од двата бугарски воено-транспортни авиона, почна транспортот на посмртните останки на загинатите во автобуската несреќа до нивните вечни почивалишта.
Поворката тргна од Скопскиот аеродром каде последна почит на загинатите со положување венци им оддадоа претседателот на државата Стево Пендаровски, претседателот на Собранието, Талат Џафери и премиерот, Зоран Заев.
На испраќањето присуствуваа и пратеници, како и претставници на верските заедници. Последна почит оддадоа и претседателката на Косово Вјоса Османи и претседателката на албанското Собрание, Линдита Никола.
Венец положи и бугарскиот амбасадор во земјава, Ангел Ангелов, а по него во знак на почит се поклонија и првиот вицепремиер Артан Груби, министерот Бујар Османи, како и претседателот на ДУИ, Али Ахмети.
На загинатите почит може да им оддадат и граѓаните на плоштадот „Скендербег“ во Скопје каде се поставени венци.
Сообраќајната несреќа во која загинаа 45 граѓани, а седум беа повредени се случи на 23-ти ноември, на автопатот „Струма“ во близина на градот Перник во Бугарија кога автобусот на „Беса транс“ од Скопје се враќал од Истанбул.