Бизнис- секторот против замрзнување на цените, одлуката не е својствена за пазарната економија

Бизнис- секторот не поддржува замрзнување на цените на прехранбените производи. Од Стопанската комора велат дека ќе следат средби со претставници на владата, но децидни се дека ваквите мерки не се поддржани од пазарната економија. Првиот човек на комората Азески посочи дека дополнително и покачувањето на цената на струјата ќе се одрази негативно.

Здравствено- економската криза ја разниша финансиската стабилност на компаниите, велат од Агро- бизнис комората при Сојузот на стопанските комори. Оттаму бараат добро испланирани мерки кои ќе се носат во соработка со реалниот сектор. Сметаат дека со одлуката за ограничување на цените на производите, кризата со која се соочува бизнисот ќе се продлабочи. Предлагаат активирање на државните стокови резерви.

Министерот за економија Крешник Бектеши на социјалните мрежи ги повика граѓаните да пријават неправилности со цените кај трговците.

Ги повикувам граѓаните да пријават на бесплатниот телефонски број 191 на Државниот пазарен инспекторат во случај на драстично зголемени цени на основни прехранбени производи.На оваа бесплатна телефонска линија сите граѓани можат да пријават неправилности кај трговците кои што не ја почитуваат Одлуката за замрзнување на цените на основните прехранбени производи, соопшти министерот Бектеши.

Одлуката за определување на највисоки цени на одделни производи во трговијата на големо и трговијата на мало ќе важи до 31-ви јануари 2022-ра година.

Дијана Ценевска