ВМРО-ДПМНЕ со нова доктрина, Мицкоски реизбран

„Поминавме четири години за внатрепартиска трансформација, следуваат реформи за да ја вратиме државата на победнички патеки“, изјави лидерот на ВМРО-ДПМНЕ, Христијан Мицкоски на редовниот конгрес на партијата. Со 489 гласови „за“ е резибран за претседател на ВМРО- ДПМНЕ. Рече, испраќаме порака на обединување и заедништво, нов договор за општествен консензус за заеднички патриотизам, нова епоха за подавање рака кон секој интелектуалец.

„На Македонија ѝ треба нов договор кој ќе го оделотвори заедничкиот патриотизам низ ново одредување за она што претставува наша првенствена цел. Таквиот општествен договор кој ќе го понуди заедничкиот патриотизам е враќање на нашите надежи за тоа како требаше да изгледа државата во моментите кога се создаваше, како активна целина на рамноправни чинители, која ќе обезбеди праведен напредок и еднакви можности за сите, од која идеја длабоко низ овие 3 децении се застрани“,рече Мицкоски во својот говор.

Пред почетокот на конгресот Мицкоски повтори дека ВМРО- ДПМНЕ инсистира на брзи предвремени парламентарни избори зашто народот треба да биде претставуван согласно тоа за што гласал, а гласал на последните локални избори за ВМРО-ДПМНЕ и Коалицијата.

Мицкоски го доби првиот претседателски мандат во партијата пред четири години, на 23-ти декември 2017-та, кога на 16-от конгрес во Валандово беше поддржан од 376 делегати.