Интерес за патувања за новогодишните празници
Наспроти дочекот на новата година, кафеаните се полни. Раздвижено е и во трговските центри. Од туристичките агенции велат дека има интерес за пречек и надвор од земјава...
Здравствените власти најавија дека нема да има нови рестриктивни мерки за време на празниците. Сепак, поради пандемијата многумина од граѓаните решија новата година да ја дочекаат во домашна атмосфера.
Изминуваат последните часови од 2021- та. Иако раздвиженоста по трговските центри, кафулињата и рестораните е зголемена, новогодишната еуфорија е далеку од онаа на која со години бевме навикнати.
„Со друштво ќе ја поминам новата година, во приватна викендица.“
„Дома ќе си седам.“
„Традиционално за Нова година дома, со семејството“- велат граѓаните кои ги анкетиравме.
Секторот туризам беше еден од најпогодените во периодот на пандемијата. Дел од туристичките работници и сега се жалат дека побарувачката е мала, а многумина и ги откажале резервациите. Други, пак, велат дека граѓаните имаат желба за патување.
„Условите за патување се променети, но желбата за патување на граѓаните е зголемена. Има интерес за патување за новогодишните празници, особено за зимските центри во соседството“, вели Сузана Зелениковска, туристички работник.
Зелениковска додава дека периодов актуелни се и потопли дестинации како што се Египет, Хургада, Анталија и Дубаи.
Ана Јосифоска- Тодоровска