Бугарија прифаќа да го користи краткото име Северна Македонија

На првата средба Ковачевски и Петков договорија интензивна комуникација и соработка меѓу двете држави. Ќе се формираат работни групи, во кои е вклучена и историската комисија. Двајцата премиери се согласија дека со засилена динамика тие треба да донесат реални резултати, меѓу кои и отстранување на бугарското вето на македонските евроинтеграции. Иако бугарскиот премиер се согласува дека секој народ има право на самопределување, не спомна точно македонски народ и јазик, повикувајќи се на Договорот за добрососедство.

„Во Договорот за добрососедство имаме многу јасна дефиниција за јазикот и тезата за јазикот, како и во дел од другите документи кои се потпишани. Бугарија прва ја призна независноста на Северна Македонија и истовремено, со тоа, ние апсолутно го почитуваме самоопределувањето на сите граѓани во Северна Македонија како и користењето на сите ваши јазици, како што се дефинирани со Уставот. Имаме полно почитување на тоа и ќе продолжиме во најконструктивен дух да ги третираме овие прашања“, нагласи бугарскиот премиер Петков.

Бугарија ја прифатила употребата и на долгото и краткото име на нашата држава. Ковачевски и Петков децидни- ова е прв конкретен исчекор во напорите за меѓусебно почитување и разбирање.

„Со бугарскиот премиер Кирил Петков се договоривме Бугарија да го користи краткото име Северна Македонија подеднакво како и долгото име Република Северна Македонија. Министерството за надворешни работи испрати вербална нота до Обединетите нации со која се потврдува дека краткото и долгото име на државата се подеднакво валидни и дека користењето на краткото име нема никаква импликација врз територијалниот интегритет на Бугарија“, изјави премиерот Ковачевски.

Во Скопје падна договор за директна и почеста комуникација за работите што се од интерес на двете држави. Следната средба ќе се одржи за една недела во Софија.

Ирина Гелевска