ЕУ најави санкции против Русија

Министрите за надворешни работи на ЕУ денеска ќе усвојат санкции против Русија поради нејзиното признавање на украинските сепаратистички региони и натамошното распоредување на војници на територијата на Украина, изјави шефот за надворешна политика, Жозеп Борел.

„Сигурен сум дека ќе има едногласна одлука“- рече тој. Според него, попладнево се очекува одлука за санкции.

Во заедничката писмена изјава, претседателката на Европската комисија, Урсула фон дер Лајен и претседателот на Европскиот совет, Шарл Мишел остро ја осудија одлуката на рускиот претседател Владимир Путин да продолжи да ги признава регионите Донецк и Луганск во Украина како „независни ентитети“.

Тие ја повторија непоколебливата поддршка на ЕУ за независноста, суверенитетот и територијалниот интегритет на Украина во нејзините меѓународно признати граници.