Хасани ја отвори работилницата „План за одбрана на Република Северна Македонија“

Заменикот министер Башким Хасани, денеска во Домот на Армијата ја отвори дводневната работилница на тема „План за одбрана на Република Северна Македонија“ која ја организира Секторот за политика и планирање во Министерството за одбрана.

Заменикот министер Хасани на отворањето порача дека одбраната претставува една од највиталните функции на државата каде што надворешната и внатрешната стабилност се основен предуслов за општествен развој и зголемување на благосостојбата на граѓаните и државата.

„Со соодветно организирање на одбраната на земјата се гарантира стабилност и подготвеноста за заштита од сите видови загрозувања. Постоењето на стабилен, ефикасен и современ систем за одбрана креира услови за стабилна меѓународна положба на Република Северна Македонија. Во 2020 година, нашата држава исполни една од своите две долгорочни надворешно политички цели, а тоа е полноправно членство во Северноатлантската алијанса како 30-ти сојузник“, рече Хасани.

Одбранбените подготовки, подвлече Хасани, се траен процес кои временски не се ограничуваат, имаат многубројни активности, мерки и задачи што ги спроведуваат носителите на овие подготовки. Како суштествен документ што ја отсликува потребата од одбранбените подготовки претставува и „Планот за одбрана“, но денес со потреба од соодветно согледување и утврдување на неговото место и улога особено како земја-членка на Северноатлантската алијанса.