Андреа гостуваше на националното финале за Евровизија на Романија
Во ревијалната програма настапија неколку актуелни евровизиски претставници од други земји. Нашата Андреа која за првпат ја изведе песната „Circles“ во живо и тоа премиерно во нејзината финална верзија...
Романската национална телевизија ТВР викендов го одбра својот евровизиски претставник за Торино. Домаќинот приреди импресивно шоу Selecţia Naţională со десет финалисти, но и гости од други земји со програма атрактивна за сите евровизиските фанови ширум Европа.
Симпатиите на домашната публика и жири ги освои WRS со песната „Llamame“.
Во ревијалната програма настапија неколку актуелни евровизиски претставници од други земји, како: Intelligent Music Project од Бугарија, Zdob și Zdub & Frații Advahov од Молдавија, Владана од Црна Гора, Ronela Hajati од Албанија, We Are Domi од Чешка, Стефан од Естонија и нашата Андреа која за првпат ја изведе песната „Circles“ во живо и тоа премиерно во нејзината финална верзија.
Поддршка на нашата претставничка во публиката беше и амбасадорот на Р.С. Македонија во Романија и Р. Молдавија, г-дин Габриел Атанасов, со кој Андреа оствари средба за време на нејзиниот престој во Букурешт.
Специјална гостинка беше победничката на Евровизија од 2016-та година, украинката Jamala, која ја изведе победничката песна „1944“, испраќајќи порака за мир и прекин на војната помеѓу Русија и Украина.