Нема нови препораки за олабавување на ковид-мерките
Со зголемување на нивото на имунизирано население заради вакцини и прележана болест, поголем дел од инфекциите сега поминуваат асимптоматски или со благи симптоми...
Комисијата за заразни болести без нови препораки за олабавување на ковид-мерките. Соопштија дека со зголемување на нивото на имунизирано население поради вакцини и прележана болест, поголем дел од инфекциите сега минуваат асимптоматски. Затоа во последните недели известувањето за Ковид-19, како и во светот, се поместува од вкупните бројки на новооткриените случаи кон бројот хоспитализации и оптовареност на здравствениот систем.
Комисијата предлага и нова методологија за процена според следниве показатели: број на новооткриени случаи во последните 7 дена на 100.000 население, број на хоспитализации во последните 7 дена на 100.000 население и процент на исполнетост на здравствените капацитети во последните 7 дена.
Од Комисијата предлагаат според овие параметри, епидемиолошкиот ризик да биде низок, среден или висок. На ваков начин сметаме дека ќе може навремено да се проценува ризикот и да се реагира соодветно во двете насоки, и за олабавување и за заострување на мерките. Со ова останува во сила носењето маски во образовните установи.
Владата ги прифати предлозите да се укине мерката за задолжително поседување сертификат за вакцинација за влез во трговските центри, за кои останува задолжително носењето заштитни маски. Граѓаните кои прележале Ковид-19, ќе може да добијат сертификат за прележаност што ќе има важност од 180 дена. Бремените жени треба да се вратат на работните места.
Наташа Јанчиќ Менковски