Бектеши: Храна има доволно, цените на горивата и храната ќе паѓаат
„Северна Македонија има многу подобри цени споредено со земјите во регионот, а цените дополнително ќе се намалат во наредниот период како резултат на намалувањето на маржите и данокот на додадена вредност“ – вели министерот за економија. Производителите на масло за јадење апелираат да не се прават резерви и очекуваат намалување на цените на репроматеријалите...
Домашните капацитети за производство на основни прехранбени производи се ставени во полн капацитет, стапува на сила сетот мерки за намалување на ценовните шокови и заштита на стандардот на граѓаните, храна има доволно, а од ноќеска ќе паѓаат цените на горивата. Пониски цени за храната се очекуваат наредната недела, откако трговците ќе ги усогласат фискалните апарати со намалените даноци, изјави министерот за економија.
Министерот Бектеши изврши увид во спроведување на владините мерки во фабриката за производство на масло за јадење „Брилијант“. Оттаму уверуваат дека репроматеријали имаат за период од три месеци и не стравуваат дека ќе има проблем за увоз на суровини.
Македонија годишно троши околу 35 илјади тони масло за јадење. Производствените трошоци во последниот период се зголемени за околу 30 насто. Владата работи на план за зголемување на земјоделските површини под сончоглед.
Славица Величковска