Одбележани 41 година од формирањето на специјалната единица „Тигар“
Во Касарната „Илинден“ во Скопје одбележани 41 година од формирањето на специјалната антитерористичка единица „Тигар“, која прерасна во елитна единица, задолжена за планирање и извршување најсложени задачи …
Планирање и извршување најсложени задачи во борба против тероризмот, решавање заложнички ситуации, обезбедување ВИП личности, асистенција во борба со организираниот криминал и спасувачки мисии на недостапни терени се само дел од секојдневните работни задачи на Тигрите чија единица денес наврши 41 година од формирањето.
Специјалната антитерористичка единица „Тигар“ е составена од врвно обучени храбри поединци без кои не минува ниту една поголема полициска акција, беше констатирано на одбележувањето на роденденот на единицата.
Тигрите се секогаш подготвени за најтешките мисии и претставуваат синоним за обученост кој го гарантира мирот и безбедноста на сите граѓани во Македонија. Ресорниот министер Спасовски и премиерот Ковачевски со суперлативи говореа за припадниците на специјалната антитерористичка единица.
Во рамките на свеченоста беа доделени признанија и благодарници на дел од Тигрите, а пред спомен плочата на загинатите припадници беа положени цвеќиња.
Марија Котовска