„Денот на црвот“ од Симона Јовановска ја доби наградата „Роман на годината“

Фондацијата „Славко Јаневски“ годинава наградата „Роман на годината“ ја додели на романот „Денот на црвот“ од Симона Јовановска. Романот е издаден во 2021-ва од издавачката куќа „Или- или“ и е од едицијата „ПроАза“.

Оваа награда е со особено значење за македонското литературно творештво бидејќи се доделува за роман кој е прв пат објавен и има голем придонес за афирмација на македонската романсиерска продукција и е поттик и поддршка на домашните автори.

Во образложението на жири комисијата се наведува дека „Денот на црвот“ е успешно книжевно остварување во кое авторката на умешен начин комбинира различни приказни, човечки судбини и егзистенцијални ситуации.

За наградата одлучуваше жири комисијата во состав: Катица Гароска Ацевска, Ермис Лафазановски, Владимир Јанковски, Лидија Пандева и Катерина Богоева. Наградата „Роман на годината“ се доделува по 23-ти пат, а во конкуренција годинава беа 39 романи.