Ракетен напад на Миколаев, се отвора хуманитарен коридор во Луганск

Страшни сцени од Миколаев по голем ракетен напад. Луѓе затрупани под урнатините, спасувачите се обидуваат да ги извлечат. Меѓу нив има жени и деца. Според некои извори, загинале најмалку 40 луѓе.

Двегодишно дете загинало во руското гранатирање во село северно од Киев. Уништени се повеќе објекти и куќи.

„Во вчерашното гранатирање, како што можете да видите, уништени се куќи и околните згради. Има повредени луѓе, а за жал едно дете загина“, изјави Родион Старик, градоначалник на с. Петровски.

Од изутрината отворен хуманитарен коридор за евакуација во украинската област Луганск. Властите ќе се обидат да ги евакуираат луѓето и да донесат храна.

Министерството за одбрана на Украина соопшти дека „привремено“ го загубиле пристапот до Азовското Море, бидејќи руските сили го зајакнале притисокот околу главното пристаниште Мариупол.

Русија пак соопшти дека нејзините сили „го стегаат обрачот“ околу Мариупол, каде што се проценува дека 80 насто од зградите и куќите се оштетени, а околу 1.000 луѓе сè уште се блокирани во импровизирани засолништа под уништениот театар.

Украинскиот претседател Володимир Зеленски преку видеопорака им се обрати на украинците од пред претседателската палата.

„Смислените мировни и безбедносни преговори се единствената шанса Русија да ја намали штетата од сопствените грешки. Време е за запознавање. Време е за разговор. Време е да се врати територијалниот интегритет и правдата за Украина. Во спротивно, загубите на Русија ќе бидат такви што ќе ви требаат генерации за повторно да зајакнете“, нагласи Зеленски.

Американскиот претседтел Бајден во телефонски разговор со кинескиот лидер Си Џин Пинг „ги опишал импликациите и последиците кои Кина ќе ги претрпи ако ѝ пружи материјална поддршка на Русија. Бајден ја истакнал својата поддршка на дипломатско решение на кризата. Двајцата лидери се согласиле и околу важноста за одржување на отворени линии за комуникација.

Марина Ристова