Зеленски: Русија се подготвува за голема офанзива во Донбас

Украинските сили се подготвуваат за нови напади на истокот на земјата. Регистрирана е акумулација на руски трупи кои, според Киев, ќе го нападнат Донбас. Ветувањата на Москва за радикално намалување на офанзивата кај главниот град и Чернихив не се доволни ни за Украина ни за западните земји. За манипулација го сметаат и најавениот локален прекин на огнот во Мариупол.

„Немам ни зборови ни време, но имам посилни емоции и задачи. Ова е моментот. Пресвртната точка кога е неопходно да зборуваме само за суштинските нешта. Преговорите продолжуваат, но засега тие се сведени само на зборови без детали. Русија ги зголемува трупите за нови напади во Донбас, и ние се подготвуваме за ова. Не веруваме никому“, изјави претседателот на Украина Володимир Зеленски.

Мировните преговори продолжуваат утре, но во онлајн формат. Делегација од украински пратенички допатува во Вашингтон за да лобира за поголема поддршка од САД.

„Бараме да се отстрани оваа вештачка поделба на офанзивно и дефанзивно оружје. Ние ја браниме својата земја, секое оружје е дефанзивно. Треба да ги истераме руските војници од нашата земја, потребно ни е секакво оружје“, изјави пратеничка во украинскиот парламент Анастасија Радина.

„Путин не може да го запреме со изјави, барања, војната нема да запре бидејќи неговата цел е да ја елиминира земјата, украинскиот народ. Токму тоа го прави во Мариупол. Овој град е масовна гробница, ова е геноцид“, изјави пратеничка во украинскиот парламент Јевгенија Кравчук.

Во меѓувреме, украинската страна обвинува за нови ракетни напади врз складиште за гориво во Дњепар. Засега нема податоци за жртви.

Европската банка за обнова и развој прогнозира дека руската економија годинава ќе се намали за 10%, додека бруто-домашниот производ на Украина ќе падне за дури 20%.

Маја С. Филдишев