Ракометарите во група со Португалија и со Турција

Македонската машка ракометна репрезентација ги доби противниците во квалификациите за ЕП 2024, кое ќе се одржи во Германија. Судбината сакаше и ракометарите да играат во земјата која можеше да биде судбоносна за фудбалерите – Португалија.

За пласман на следниот евро-шампионат ќе треба да одиграме поволно против Португалија, Турција и против Луксембург. Така реши денешната ждрепка во Берлин, која може да се оцени како добра за Македонија. Португалија е извонредна селекција, но не е Норвешка или Франција, а Турција и Луксембург исто така не доаѓаат од врвот на своите квалитативни садови.

За да се пласира на ЕП; Македонија треба да го освои првото или второто место во групата 1, но виза ќе има и за најдобрите четири трети места. Покрај домаќинот Германија, на ЕП директно се пласирани и шампионот Шведска, финалистот Шпанија и третопласираната Данска.