Енергетската криза закана за јавните претпријатија во Куманово

Енергетската криза, односно неколкукратното покачување на цените на електрична енергија и гас силно ги погодија кумановските јавни претпријатија, но и училиштата. Состојбата дополнително ја влоши и покачувањето на минималната плата, велат надлежните од претпријатијата. Сметката во септември лани, на јавното претпријатие „Водовод“ била над еден милион денари, во декември два милиони, а сега во јануари се регистрирани рекордни 7 милиони денари, како и дополнителни пет милиони за февруари.

Она што е во рамките на нашите можности го надмируваме, за потсетување работиме со рамка која е 16 милиони денари и да имаме доволно финансии рамката не би дозволила да ги платиме сметките-вели Оливер Стојмановски, директор на ЈП „Водовод“ Куманово.

И јавното претпријатие „Чистота и зеленило“ е меѓу погодените од енергетската криза, но и од покачувањето на платите, со кое велат се опфатени над 75 проценти од вработените. Приходите од 12 милиони денари, потенцираат нема да бидат доволни за плати, а дополнителни се трошоците за нафта и електрична енергија од 2 и пол милиони денари. Стравуваат дека ваквата состојба може да влијае и врз квалитетот на услугата којашто ја нудат кон граѓаните.

За 30 проценти е зголемена цената на нафтата која е основен енергенс што ја користи јавното претпријатие поради возилата кои го изнесуваат и депонираат отпадот во Куманово. Гасот од 22 денари сега имаме цена од 95 денари што значи зголемување за некаде четирипати и затоа е затворен и затворениот градски базен-вели Даниел Стојчевски, директор на ЈП „Чистота и Зеленило“ Куманово.

Кумановските претпријатија преку Здружението АДКОМ доставиле барања за поддршка до Владата за надминување на состојбата. Сè уште не добиле никаков одговор.

Елена Георгиевска