„Поместени граници“ за Светскиот ден на уметноста

По повод Светскиот ден на уметноста, Друштвото на ликовни уметници во соработка со Министерството за култура на Република Северна Македонија,  утре на 15-ти април, во 13.30 часот, ќе ја отвори изложбата „ Поместени граници “ во дворот на Министерството за култура, која ќе трае до 20 часот истиот ден.

Оваа изложба традиционално се одржува по шестти пат и со  поставувањето на изложбата во отворениот простор - паркот на Министерството за култура, Министерството се приклучува во одбележувањето на овој Светски ден  на уметноста.

„Поставувајќи ја уметноста поблиску до гледачите, дури и до случајните минувачи, ја продолжуваме мисијата уметноста да биде духовна храна, преку нејзе да испратиме порака и да запрашаме колку сме моќни да направиме промени“, порачуваат од Друштвото на ликовни уметници.

Овогодишното издание на годишната изложба на ДЛУМ ,,Поместени граници” ја има можноста на користење на отворениот простор-паркот на Министерството за култура и со тоа се вклучува во заедничко празнувањето на овој светски датум на уметноста.

Од  ДЛУМ додаваат дека изложбата е концепт проект посветен на новите медиуми, потенцирајќи ги уметничките процеси кои се отворени за промени, уметноста во хармонија со просторот, односот уметност и природа. Изборот на уметниците, воглавно од младата генерација, со свои решенија од последната година на творештвото, внесуваат енергија на поврзаност со природата, но и посветеност на вечни теми на бесконечност, релативност  на времето, еколошкиот пристап кон постоењето, но уметниците се посветуваат и кон пробивањето на границите  на разбирањето и надежта.

На  изложбата ќе  се претстават 8 уметници: Марија Светиева, Ненад Тонкин, Дарко Базерко, Ива Станковска, Ана Трајковска, Јана Јакимовска, Славчо Максимовски и Ана Ивановска