Ковачевски: Се фокусираме на економскиот развој

Премиерот Димитар Ковачевски денеска се обрати на Форумот „100 дена Влада“ на кој низ форматот прашања и одговори, заедно со вицепремиерите и министрите, ги презентираа остварувањата во овој период.

Ковачевски истакна дека Владата останува посветена на клучните прашања од интерес на граѓаните.

„Посебно внимание ќе им биде посветено на темите за економската сигурност и за подобар животен стандард. Токму затоа инсистирам во неколку наврати дека нашиот фокус е ставен на економскиот развој на земјата и на финансиска поддршка за семејствата. Исто така, оваа Влада останува да биде ефикасна, одговорна, чесна и високо продуктивна во работењето, посветена на поставените високи цели кои со многу работа и труд ќе ги реализираме“, нагласи премиерот во своето обраќање.

Премиерот Ковачевски, зборувајќи за евроинтеграциите, повторно нагласи дека дијалогот со Бугарија мора да се базира на европски вредности, почит и достоинствен разговор. Нагласи дека како држава во изминатите триесет години имаме направено многу и се имаме откажано од многу, сè со цел да ги исполниме критериумите за членство во ЕУ.