60 години од отворањето на првиот лекторат по македонски јазик во светот

Денес, на Денот на македонскиот јазик, со свечен, виртуелен настан ќе се одбележат 60 години од отпочнувањето на изучувањето на македонскиот јазик, литература и култура на Филозофскиот факултет при Универзитетот во Љубљана. Во академската 1961/1962 година, во Љубљана беше отворен првиот лекторат по македонски јазик во светот, за набрзо потоа да прерасне во Катедра за македонски јазик и книжевност, којашто и денес успешно функционира во рамките на Одделот за славистика.

По овој повод, честитка до Филозофскиот факултет во Љубљана упати директорката на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје (МСМЈЛК при УКИМ), проф. д-р Весна Мојсова-Чепишевска.

„Сакам со почит да му се заблагодарам на Филозофскиот факултет во Љубљана дека прв во оној заеднички југословенски образовен систем распишува конкурс за лектор по македонски јазик, уште во 1960 година. Тоа е неколку години пред да ја започне својата работа Семинарот за македонски јазик, кој од 1967 година континуирано се грижи за сите лекторати по македонски јазик на странските универзитети. Сакам и да им се поклонам, но и сите ние од МСМЈЛК сакаме да им се поклониме, и на Блаже Конески и на Харалампие Поленаковиќ, кои во тој период, едниот како шеф на Катедрата за македонски јазик и јужнословенски јазици, а другиот како шеф на Катедрата за македонска книжевност и јужнословенски книжевности до Деканатот на Филозофскиот факултет во Љубљана ја испраќаат својата стручна оценка за кандидатот Блаже Ристовски. Поклон и за првиот лектор по македонски јазик – Блаже Ристовски кој ја започнува историјата на оваа македонистика во учебната 1961/62 година.“ – истакнува Мојсова-Чепишевска во честитката.

Директорката на МСМЈЛК, во обраќањето до своите словенечки колеги и ја истакнува важноста што под палка на вториот лектор, Драги Стефанија, инаку ученик на Блаже Конески, лекторатот прерасна во самостојна Катедра за македонски јазик и книжевност во рамките на Одделот за словенски јазици и книжевности, затоа што тоа и ја отсликува поддршката за македонистиката којашто непрекинато ја дава Филозофскиот факултет на Љубљанскиот универзитет.

„Но, македонистиката во Љубљана можеше и да се успори, па и да замре доколку од 1999 до 2001 година, Катедрата не ја поведе Катерина Велјановска, а од 2002 година и Намита Субиото која, еве, цели 20 години стаменито и храбро застанува на кормилото на оваа Катедра. Поклон и за Намита Субиото. Благодарение на нејзината заложба се засилува и соработката со МСМЈЛК при УКИМ, па така во тие нејзини 20 години на овој наш XXI век, на летните и двете зимски школи учествуваа над 50 студенти и професори од Филозофскиот факултет во Љубљана“ – вели во честитката во име на МСМЈЛК, Мојсова-Чепишевска.

„Се надевам дека оваа бројка од педесетмина, секоја наредна година ќе се зголемува и зголемува, а еве, најновите ги чекаме на претстојната 55. Летна школа. Се надевам дека ќе се зголемуваат и преводите на македонската литература на словенечки, нивните и на некои други, нови словенечки македонисти.“ – напоменува директорката на МСМЈЛК, во завршницата на честитката.