МЗТ убедлив против Пелистер, се изедначи на врвот на табелата

МЗТ Скопје ја оствари првата победа во три средби против Пелистер во домашното првенство оваа сезона. Славеше со 95-76, со што дојде до скор од 23-4 во победи и порази или 50 бода, колку што има и Пелистер. Тоа значи дека дуелот во Битола, во последното, 10. коло од оваа суперлигашка фаза ќе решава кој ќе биде прв и кој би ја имал предноста на домашен терен во плеј-офот, ако претходно некој не киксне попатно.

Вечерашната средба беше изедначена само во првите три минути, по што аеродромци со осум поени во низа дојдоа до 15-7 и го најавија крајниот епилог. Како одминуваше средбата, растеше предност на сино-белите, за потоа, во финишот од втората и стартот од третата четвртина со серија 14-2 да дојдат до огромни плус 21 (58-37), со што ги урнаа надежите на гостите дека би можеле повторно да изненадат во Аеродром.

Немања Милошевиќ со 17 поени и девет скока и Хуан Дејвис со 16 поени и пет скока беа првите имиња кај МЗТ Скопје, додека двоцифрен поентерски ефект имаа уште Роберт Рикиќ со 13 и Дамјан Стојановски со 12 поени. Никола Малешевиќ со 17 и Игор Кесар со 15 поени беа најпрецизни кај Пелистер.

Во вториот вечерашен дуел, последен од петтата суперлигашка рунда, Гостивар го совлада ТФТ (92-85) и ептен ја направи интересна борбата за третата и четвртата позиција, кои водат во доигрувањето за титулата.