Ковачевски воздржан од коментар за снимката на Џафери, опозицијата бара оставка
Премиерот Ковачевски не сака да го коментира однесувањето на спикерот Џафери во Собранието. Ја видел снимката, но вели не се гледало кој со кого зборува. ВМРО-ДПМНЕ бара оставка од Џафери...
По жестоките реакции за однесувањето и речникот на спикерот Џафери кон вработените во собраниските служби, премиерот Димитар Ковачевски воздржан во коментарот. Бидејќи се слуша глас, а нема лик, не сака да зборува за викотниците и пцовките искажани од првиот парламентарец.
Талат Џафери без изјава за инцидентот, но за разлика од воздржаноста на премиерот, опозициската ВМРО-ДПМНЕ жестока во критиките. Бара оставка, како што велат заради примитивизмот на собранискиот претседател.
И додека опозицијата ја блокира работата во Собранието, премиерот Ковачевски вели дека простор за разговор за иднината на граѓаните и државата меѓу политичарите има, но таа пред сè треба да се одвива во Собранието, при тоа повторно одбивајќи да се сретне со Мицкоски и да разговара само за предвремени избори.
Миле Ристески