Вевчани се подготвува за туристичката сезона

Вевчани се подготвува за туристичката сезона. Се реконструираат мостовите на Вевчанските извори, се уредуваат локалните улици, пешачките планински патеки и излетничките места. За продолжените празнични викенди, кои се сметаат како репер за летната сезона најмалата општина во земјава ја посетиле голем број туристи од земјава и соседството.

„Се подготвуваме за туристичката сезона, која можам да кажам дека веќе е почната. Имавме доста гости за продолжените викенди за Велигден и Први мај. Вевчани беше слободно може да речам преполно, не само со гости од Македонија, туку и од странство, претежно од Србија“, вели Спасе Кочоски градоначалник на општина Вевчани.

Живописната општина на Јабланица се фокусира на развој на алтернативен и гастро-туризам. Покрај изворите, главни атракции се излетничките места Јанков Камен, манастирот Свети Спас, Летничките езера и бројните традиционални етно ресторани.

„Излетничкото место Јанков камен е спремно, исчистено, уредено. Изворите моментално ги реновираме мостовите на Вевчанските извори. Ќе продолжиме со активност за одржување на Вевчани чисто“, додава Кочоски.

Пред сезона комуналното претпријатие ги расчисти сите диви депонии во околината на Вевчани, од таму апелираат за поголема грижа за животната средина.

Соња Рилковска