Дистрибуирани гласачките ливчиња од битолската печатница „Киро Дандаро“

Под силно полициско обезбедување и во присуство на претставници на Државната изборна комисија, претпладнето беа дистрибуирани гласачките ливчиња за првиот круг на претседателските избори.

Во битолската пецатница „Киро Дандаро“ се испечатени 1 милион 779 илјади и  572 гласачки ливчиња. Од нив, 8 илјади и 532 ливчина ќе бидат доставени до конзуларните преставништва каде што ќе гласа дијаспората.

Од битолската печатница велат дека веднаш по затворањето на избирачкиот список за предвремените парламентарни избори ќе започнаат со печатење на овие гласачки ливчиња како и за оние за евентуалниот втор круг на претседателски избори.

„Се испечати и се испорача целиот гласачки материјал, како и недоверливиот материјал, како записници, паравани, самолепливи етикети итн. Доколку има втор круг, кој би се поклопил со предвремените парламентарни избори, подготвени сме да ја извршиме работата без проблеми“, изјави диеректорот на печатницата „Киро Дандаро“, Драги Милошевски.