Вархеји: Се работи на заемно прифатливо решение за да започнат преговорите во јуни

Еврокомесарот за проширување Оливер Вархеји, очекува Софија да се согласи за почеток на преговарачкиот процес со Скопје. Вархеји кој вчера имаше средби со Радев, Петков и Генчовска, на „Твитер“ соопшти дека се работи на заемно прифатливо решение за да започнат преговорите со Македонија и Албанија во јуни.

„Разговаравме за директните последици од војната во Украина за Западен Балкан и пошироко. Работиме на заемно прифатливо решение за да можеме да ги започнеме преговорите со РС Македонија и Албанија со одржување на меѓувладина конференција во јуни“ соопшти Вархеји по средбата со министерката за надворешни, Генчовска.

Еврокомесарот за проширување нагласи дека важноста од стабилен и просперитетен Западен Балкан нема цена. Во овој контекст, значаен придонес би бил одржувањето на првата меѓувладина конференција со Северна Македонија и Албанија.

Треба да работиме на ова заедно. За три недели ќе се вратам во Софија за да најдеме заеднички основа и поддршка од Бугарија, за да го започнеме преговарачкиот процес со Република Северна Македонија во јуни“, пишува еврокомесарот Вархеји.