Киев ја исклучи можноста за примирје или отстапки за Русија

По падот на Мариупол, руската офанзива се пренасочува кон Лиман. Југоисточниот фронт останува во фокусот на Москва, но битки се регистрирани и на други локации. Русија обвинува за украински напад врз Курск. Во Ирпин се бројат жртвите и се проценува штетата.

„Руските војници не се борат против други војници, туку против деца, училишта. Само сакаат да ја избришат украинската историја“, вели млад украинец.

Претставникот за Крим, Георги Мурадов, предвидува федерализација на Украина. Киев дециден – нема да отстапиме делови од територијата. Украинскиот претседател Зеленски разговарал со италијанскиот премиер Драги за деблокада на руските пристаништа и значајноста на дополнителните санкции.

„Состојбата во Донбас е исклучително тешка. Како и во претходните денови, руската армија се обидува да ги напаѓа Словјанск и Северодоњецк. Украина секојдневно пружа отпор, а нашите бранители ги спречуваат плановите на Русија, им ги попречуваат“, изјави Володимир Зеленски, претседател на Украина.

Полскиот претседател Дуда, во посета на Киев. Тој е првиот странски лидер што се обратил во Врховната Рада.

Во меѓувреме, Русија им забрани влез во земјата на 963 Американци, вклучувајќи ги и претседателот Бајден, државниот секретар Блинкен и шефот на ЦИА, Брнс. Руската страна во преговорите со Украина ќе ја разгледа иницијативата за размена на заробените војници на украинскиот баталјон Азов, за украинскиот политичар Виктор Медведчук. 67-годишниот претприемач, близок соработник на Путин е во домашен притвор од мај лани, поради обвинение за предавство и обид за ограбување на природните ресурси на Крим.

Литванија од денеска нема да увезува гас, нафта и струја од Русија. За властите, овој потег е важен пресврт кон енергетската независност, но и израз на солидарноста со Украина.

Маја С. Филдишев