Министерството за економија ги додели наградите за најдобрите општествено одговорни практики во 2021 година

Министерството за економија денеска по 13-ти пат ги додели Наградите за најдобрите општествено одговорни практики на македонските претпријатија во 2021 година.

Заменик-министерот за економија Зоран Маневски на доделувањето на наградите истакна дека компаниите се соочуваа и сè уште се соочуваат со предизвикот за одржување на своите економски операции во таканаречената „нова реалност“. Некои од нив се обидуваат да ја задржат стекнатата пазарна позиција, други едвај ја одржуваат својата ликвидност, трети се борат да изнајдат модалитети за освојување нови конкурентски предности. Ова е период на адаптации, менување на стратегии за работа и воведување нови бизнис тактики.

Националната награда за првпат беше доделена во 2008 година а по 13-ти пат се доделува за 2021 година.

Во 2021 година, на конкурсот за оваа Награда беа пријавени 19 проекти, од 12 претпријатија, од кои 10 се големи претпријатија (82% од вкупниот број субјекти), а две се мали и средни (18%), поточно две средни. Од вкупно 19 проекти, 17 се на големи претпријатија (89%), а две на мали и средни (11%).

Оваа година, за првпат аплицирало едно претпријатие, заедно со другите искусни општествено-одговорни претпријатија, што покажува дека интересот за Националната награда континуирано расте. Најголем број од пријавените компании се од финансискиот сектор (33%), од услужниот сектор (17%) и прехранбената индустрија (17%).

Четири големи претпријатија аплицираа со вкупно 11 проекти во различни категории.

Во четири категории конкурира Алкалоид; во три категории конкурира А1 Македонија и во две категории конкурираа Комерцијална Банка и Макпрогрес – Виница.

Добитници на Националната награда за најдобри општествено одговорни практики на македонските претпријатијата 2021, во вид на статуетки во петте различни категории на наградата, се следните општествено одговорните проекти на:

Алкалоид АД Скопје („Луѓето пред сè“); А1 Македонија ДООЕЛ Скопје („The New Normal“); Халк Банка АД Скопје („HalkEco“); Алкалоид АД Скопје („Фотоволтаична електрана“) и НЛБ Банка АД Скопје („НЛБ Рамка за помош“)

Проектите кои влегоа во потесен избор за доделување на статуетка, се наградуваат со Плакети, со кои беа наградени проектите на:

Алкалоид АД Скопје („Заштита на вработените во време на Ковид-19“); А1 Македонија ДООЕЛ Скопје („A1 Future Hub); Цементарница УСЈЕ АД Скопје („Грижа за благосостојбата на нашите луѓе“); Комерцијална Банка АД Скопје („е-Продавница за новата ера – Искуства и совети за поголема online продажба“); Комерцијална Банка АД Скопје („Борбата со Ковид-19 е заедничка обврска – Комерцијална го помага јавното здравство“); А1 Македонија ДООЕЛ Скопје („Интернетот не е само игра … Кликај безбедно!“); Фармахем ДООЕЛ Скопје („Со мали чекори до подобро утре!“)

Во конкуренција од 19 проекти од сите категории, Признанието за најинвентивна практика го доби проектот „НЛБ Рамка за помош“ на НЛБ Банка АД Скопје

Признание за најуспешна практика во справување со последиците од кризата предизвикана од Ковид-19, во конкуренција на сите проекти од 5-те категории на Наградата за најдобри општествено одговорни практики во 2021 година доби проектот „The New Normal“ на А1 Македонија ДООЕЛ Скопје

На сите останати проекти, организаторите им доделија Благодарници за учество во Наградата, како признание за вложениот труд, време и средства.