За две недели – четири нови инвестции

Воздушни перничиња ќе се произведуваат во Кичево. Автомобилски компоненти и електрични инсталации во oхридско – струшкиот регион и во Велес. Италијанската Дијатек ќе работи во Бунарџик. За две недели четири компании ги објави своите инвестициски планови. Ќе се отворат над 3.000 работни места.

„Ќе има над 3.000 вработувања, но многу е важно што повеќето од овие инвестиции не се во Скопје. Во Скопје веќе има голем број на инвестиции, но сега има инвестиција во Кичево, во охридско – струшкиот регион, што значи дека целиот концепт на дисперзирани слободни економски зони дава резултати и вродува со плод“, изјави Виктор Мизо, директор на ДТИРЗ.

Американската КСС во Кичево ќе вложи 20 милиони евра и ќе отвори 1.000 работни места. Преговорите со компанијата биле маратонски, треале повеќе од пет и пол години. На крајот, македонските власти успеале да ги убедат американците во добрата бизнис – клима.

„Веруваме дека владините политики за привлекување странски инвестиции се добри и тоа е она што не привлече во земјата“,  Џим Скарпа, заменик – претседател на КСС.

Дијатек во Бунарџик ќе вложи 10 милиони евра и ќе отвори 200 работни места. Во охридско – струшкиот регион - две нови германски инвестиции од автомобилскиот сектор.  Првата ќе отвори 800 работни места, втората на “ОДВ Електрик„ уште 1.000. Веќе стратуваше и изградбата на фабриката на Маркарт во Велес. Инвестиција вредна 35 милиони евра за 600 работни места.

„Оваа инвестиција значително ќе придонесе за развој на локалната економија. Од една страна, ќе се намали невработеноста во Велес, а од друга страна, ќе се раздвижат локалните компании кои ќе бидат вклучени како нејзини добавувачи“ ,  изјави Игор Андреев, доктор на економски науки.

Инвестициите не се сконцентрирани само во Скопје. Италијанската ИТЕК се реши за Тетово, холандската ИД Балкан за Свети Николе, Амфенол за Кочани, хрватски Кумал го одбра Штип, а туниски Кофикаб ќе се позиционира во Кавадарци, веднаш до Дрекселмајер.

Мартин Пушевски