Мирен старт на изборите во Штип
На 80 избирачки места во Штип, точно во 7.00 часот утринава беа отворени вратите за 41.698 гласачи...
Гласањето, на територијата на цела општина се одвива во мирна, фер и демократска атмосфера
„Сите избирачки места се отворени точно на време, гласањето почна секаде и досега немаме никакви проблеми“, вели Маре Каранакова, заменик претседател на Општинска изборна комисија – Штип.
Излезноста на гласачите, во утринските часови е вообичеано мала, но нив во континуитет ги имаше на гласачките места.
„Досега гласаа 27 граѓани со право на глас и се се одвива во најдобар ред“, вели Јорданчо Здравев, претседател на ИО на ИМ 2263 – Штип.
Први своето право на глас го искористија повозрасните.
„Ние сме меѓу првите, гласавме 12-ти...Се’ е добро, изборите се одвиваат мирно... Јас досега не сум пропуштила ниту еден избирачки циклус... Многу е важно секој да си го исполни правото на глас...“, велат граѓаните.
Инаку, на ниво на источен регион, денес се гласа на 373 избирачки места, а право на глас имаат 162.403 гласачи.
Оливера Жежова