Села: Предлогот е прифатлив, единствен пат за Македонија треба да биде Европската Унија

Немаме двоумење, ние би прифатиле таков предлог-изјави претседателот на Алијансата за Албанците, Зијадин Села, по средбата со премиерот Димитар Ковачевски која е дел од најавените широки консултации за францускиот предлог со цел надминување на спорот со Бугарија и за отпочнување на преговорите со ЕУ. Сели рече дека ги разбира чувствата на своите сограѓани Македонци, но и дека Македонија нема алтернатива освен ЕУ. Иако Села поддршката не ја услови со ништо, сепак додаде дека со отворањето на Уставот за имплементирање на делови од францускиот предлог, треба и да се разговара за уставни промени кој се однесуваат и на употребата на албанскиот јазик.

Прифаќањето на предлогот од нивна страна го гледа како овозможување на продолжувањето на евроинтегративниот пат, и посочи дека премиерот Ковачевски на средбата му дал уверување дека македонскиот јазик во документот останува во чиста формација. Дополнително премиерот на лидерот на Алијанса за Албанците му порачал дека неопходно е државничко однесување и вистинска одлука за мир, стабилност во државата и просперитет на сите народи во Македонија.

Села смета дека доколку две страни имаат спор како во случајот Скопје-Софија, треба да се движиме во насока на меѓусебно препознавање, и строго почитување на Копенхашките критериуми, со посебен акцент на универзални човекови права, меѓу кои и правото на самоопределување. Зачленувањето на земјава а во ЕУ, според Села, има геополитичко значење и политичарите треба повеќе да размислуваат за стабилноста на регионот, а помалку за добивање на политички поени.

Марина Т. Стојанова