„Важна одлука за Северна Македонија да оди напред“

Во овој критичен момент во европската историја поради неоправданата агресија на Русија врз Украина, напредувањето на Албанија и Северна Македонија кон ЕУ е клучно за зајакнување на кохезијата и отпорноста на целиот европски континент. Во заедничка изјава, американскиот државен секретар Блинкен и шефот на европската дипломатија Борел го повикаа македонскиот парламент да донесе одлука со која земјата ќе оди напред.

„Го поздравуваме компромисниот предлог кој ги зема предвид интересите и грижите и на Северна Македонија и на Бугарија, врз основа на меѓусебна почит, доверба и разбирање. Суверената одлука на парламентот на Северна Македонија ќе биде важна да се оди напред. Духот на конструктивниот компромис на кој е изградена европската интеграција треба да продолжи да ги инспирира сите вклучени во овој историски процес“, се вели во заедничката изјава.

Борел и Блинкен уверуваат дека ЕУ и САД се посветени на поблиска соработка во Западен Балкан и оти обезбедувањето стабилност и просперитет и преточувањето на европската и евроатлантската иднина во реалност останува заедничка цел на Брисел и Вашингтон. Пред расправата во македонското Собрание, повеќе странски државници испратија повици земјава да го прифати предлогот. Меѓу нив беше и францускиот претседател Макрон на чијашто иницијатива дојде европскиот предлог, кој рече дека договорот не го доведува во прашање официјалното постоење на македонскиот јазик, кој е дел од нашиот идентитет.

Мартин Пушевски