ВМРО-ДПМНЕ: Или уставни измени веднаш во Собрание, или оставка и избори
Доколку Ковачевски и СДСМ се сигурни дека имаат 80 пратеници, веднаш по враќање на пратениците во Собранието да ги стават уставните измени на дневен ред на првата собраниска седница.
Секојдневните предавства од криминалната власт на СДСМ и ДУИ треба да престанат. Константните притисоците од власта на Ковачевски кон пратениците на ВМРО-ДПМНЕ нема да поминат, соопштуваат од опозициската партија.
Оттаму велат- за да престанат притисоците од страна на власта кон пратениците, СДСМ и Ковачевски имаат избор и понуда од страна на претседателот Христијан Мицкоски. Доколку Ковачевски и СДСМ се сигурни дека имаат 80 пратеници, веднаш по враќање на пратениците во Собранието да ги стават уставните измени на дневен ред на првата собраниска седница.
Но, ако на таа седница не поминат уставните измени за вметнување на Бугарите во Уставот, наредниот ден, да се распушти Собранието и да се оди на предвремени парламентарни избори.
Ако од власта се сигурни дека она што го прават е исправно еве им избор, или слугување на Бугарија и промена на Уставот или предвремени избори. Ова е чесна и фер понуда. На потег е Ковачевски, стои во соопштението од ВМРО-ДПМНЕ.