Неизвесна грејна сезона во руралните училишта во Општина Карбинци
Нема интерес на јавните тендери за огревно дрво за руралните училишта и за училиштен превоз во Општина Карбинци. Енергетската криза и нестабилните цени на горивата и дрвата се закана за нормално одвивање на наставата во една од трите рурални општини во источниот регион…
Високата цена на дрвата за огрев ја прави неизвесна грејната сезона во руралните училишта во Општина Карбинци. Заради нестабилната цена на дрвата, по трет пат се распишува јавна набавка за околу 90 метри кубни дрва за загревање на девет подрачни училишта. Општината планира од идната година да се елиминира загревањето со дрва во училиштата.
Пред стартот на училишната година, неизвесен е и превозот на учениците од планинските села во централното училиште. Енергетската криза и нестабилните цени на горивата ја проблематизираат и оваа набавка.
Останатите две рурални општини на истокот, Чешиново-Облешево и Зрновци имаат обезбедено дрва за огрев во училиштата, како и превоз на учениците до централните училишта.
Славица Величковска