Силните врнежи од дожд предизвикаа поплави низ земјава

Синоќешното невремето кое ја зафати земјава предизвика поплави во Прилеп, Битола, Виница, Неготино, Тетово. Во прилепското село Лажани биле поплавени 50 куќи, а дел од населението било евакуирано по обилните дождови. Нема повредени жители.

„Причина е излевањето на реката, која поради невремето, како и несовесното градење и отпадот, поплави голем број куќи, велат од локалната власт. Покрај Лажани во општина Долнени, поплавени биле уште неколку села, а Центарот за управување со кризи соопшти дека водата во околината почнала да се повлекува.

Во Долнени струјата била превентивно исклучена за заштита на луѓето и мрежата. Има поплавени куќи и во Кривогаштани. Во Неготино се регистрирани оштетени кровови и поплавени домови. Силен дожд врнеше и во Битола и Крушево. Поради паднато дрво вчера неколку часа во прекин беше и сообраќајот во двата правци на патот Битола – Меџитлија.

Невремето во Виница поплави 30 до 40 објекти. Во Виница наврна најмногу дожд на метар квадратен – 55 литри. И во Тетово по обилните врнежи од дожд има поплавени подруми, гаражи и куќи, а се излеа и канализација од неколку шахти.