Новата учебна година во Битола ќе започне со помал број првачиња
Стартот на новата учебна година во дел од градовите нема да донесе голема радост. Во битолските основни училишта ќе седнат стотина првачиња помалку од лани. Причина е негативниот природен прираст. Веќе е јасно дека сериозен предизвик за училиштата ќе биде и енергетската криза…
Повеќегодишната ниска стапка на наталитет во Пелагонискиот регион и се почестите иселувања на младите веќе ја испорачаа непопуларната слика. Во однос на минатата, оваа учебна година во битолските основни училишта ќе започне со близу сто првачиња помалку.
Најкритично е во основните училишта „Д-р Трифун Пановски“ и „Ѓорѓи Сугарев“ каде се запишале само по 40-тина првооделенци. Педагозите сметаат дека освен познатите фактори на лошата состојба влијаат и некои банални проблеми.
Состојби кои носат загриженост и кај наставниот кадар во обезбедувањето на потребниот фонд на часови, но и веќе го навестуваат за следните години, дисбалансот што ќе се одрази врз уписната политика на средните училишта.
Ако минатите две учебни години предизвик беше ковид-пандемијата и онлајн наставата, годинава притиска енергетската криза. Раководителите на училиштата велат дека течат подготовките училниците да бидат топли, но и организацијата за штедење или отстранување на дополнителните грејни тела од училниците.
Стевче Митревски