Потребни се поголеми вложувања во научно-истражувачката дејност
Без поголеми вложувања во истражувачката дејност не можеме да се надеваме дека некој под нашите универзитети ќе биде меѓу првите 1.000 на светската ранг-листа, вели ректорот на битолскиот универзитет, Коруновски. Запишаните 870 бруцоши во првиот уписен рок на државната квота говори дека има благо намалување на бројката на нови студенти во однос на ланскиот прв уписен рок.
Без вистинска стратегија за високо образовани и сериозни вложувања во научно-истражувачкиот процес, тешко дека во догледно време некој од нашите универзитети ќе се најде околу првите 1.000 места на светската ранг-листа. Ваквите места се добиваат за наука, а не за образование, а актуелните 0,02% средства од буџетот за оваа намена се недоволни за поголеми успеси, дециден е ректорот на универзитетот „Св. Климент Охридски“.
На УКЛО по првиот уписен рок во државната квота има 870 нови бруцоши. Факултетите за безбедност, туризам, информатичко-телекомуникациски технологии и техничките науки, се покажаа како најпримамливи за оние кои имаат точна визија и задоволително свидетелство.
Евидентен е благиот пад на новозапишани студенти. Со вториот и третиот уписен рок се очекува бројката на нови студенти да достигне околу 1.200.
Во следнава академска учебна година има освежување со десетина нови програми, но сепак Коруновски вели, фокусот ќе биде ставен на зголемување на практичната работа и соработката со стопанството.
Стевче Митревски