Одложено судењето за пожарот во тетовската модуларна болница
Поради отсуство на дел од обвинетите се одложи судењето за пожарот во модуларната болница во Тетово. На 14 октомври закажано е ново рочиште. На обвинителна клупа треба да седнат поранешниот директор на тетовската болница Флорин Бесими, раководно лице во болницата и дежурниот доктор. Во пожарот животот го загубија 14 луѓе...
Не чувствувам вина, тоа ќе го кажам во судот, посочи Флорим Бесими, поранешниот директор на Клиничката болница Тетово, откако денешното судско рочиште за пожарот во модуларната болница, се одложи за наредниот месец.
Од обвинетите за трагичниот настан, само Бесими беше присутен на рочиштето. Неговиот адвокат побара да имаат увид во доказниот материјал, а обвинетиот ги повика медиумите да го следат процесот до крај, за како што рече да се дознае вистината.
Бесими како и Артан Етеми кој беше раководно лице во болницата, се товарат за кривично дело, тешки дела против општата сигурност, а третообвинетиот доктор, Бобан Вучевски, за кривично дело непостапување според здравствени прописи за време на епидемија. Обвинение има и за правното лице Клиничка Болница - Тетово за кривични дела, предизвикување на општа опасност и непостапување според здравствени прописи за време на епидемија.
Инаку, Обвинителството во октомври минатата година го објави извештајот на ОКТИВ при МВР. Со вештачењето се утврди дека пожарот настанал како последица од електрична куса врска.
Следното судско рочиште е закажано за 14-ти наредниот месец.
Зоран Димовски