Во Охрид 35. издание на Охридскиот пливачки маратон

Се одржа 35. Охридски пливачки маратон. И покрај тоа што Националната пливачка федерација поради финансиски потешкотии, минатиот месец се откажа од организација на најголемата водена манифестација во земјава, општина Охрид изнајде финансии и техничка организација за да се одржи маратонот.

На патеката „Климе Савин“ денес најбрз беше аргентинецот Матијас Дијас Хернандес. По повеќе од шест часа во вода и битка со брановите, втор на целта пристигна Италијанецот Франческо Гетини. Трет беше македонецот Евгениј Поп Ацев.

„По петти пат учествувам на маратонот, трката денес беше многу тешка, водата е навистина ладна, големи бранови имаше. Среќен сум многу што успеав“, вели Матијас Дијас Хернандес.

„Прв пат учествувам на Охридскиот маратон, долга трка. На крајот беше многу ветровито и бранови. Беше тешко, особено последниот час беше многу тежок“, вели Франческо Гетини пливач од Италија.

Охридскиот пливачки маратон е од огромно значење за Охрид, не само за развивање на спортскиот дух, туку и за поголема туристичка промоција на градот.

„Се надеваме дека наредната година ќе имаме многу повеќе пливачи а затоа гарант е состанокот којшто го договоривме со пливачката федерација уште во октомври оваа година. Да имаме поголем период во којшто ќе подготвиме и ќе најавиме многу повеќе иновации со пливањето, но за тоа потоа“, вели градоначалникот Кирил Пецаков.

Охридскиот пливачки маратон е белег на градот, но веќе две децении нема натпреварувач од Охрид, а тоа се должи на немањето услови за тренирање. Сè уште не е завршен затворениот пливачки базен, чија изградба започна во 2015-та година.

Соња Рилковска