Дополнителна поддршка за лозарите и винариите
За предаденото винско грозје во преработувачките капацитети лозарите од државата треба да добијат дополнителни 2 денари субвенција. Винариите кои извезуваат ќе имаат право и на 2, односно 3 денари за литар во зависност од тоа дали се работи за наливно или за флаширано вино...
За лозарите и винариите, годинава се предвидени две дополнителни мерки за финансиска поддршка. Првата е за предаденото грозје во регистрирани капацитети за производство на вино во висина од 2 денари за килограм. Корисници на оваа нова подмерка се земјоделските стопанства кои имаат површини под лозови насади и остварено производство на винско грозје од реколта 2022, кое е предадено во винарските визби или е преработено за потребите на сопствениот преработувачки капацитет.
Според Министерството за земјоделство тоа ќе биде зголемување за 30 проценти на откупната цена на винското грозје.
Грозјето од сортата Смедеревка оваа година ќе се откупува по просечна цена од 13 денари, а вранецот по 15 денари за килограм, односно заедно со субвенцијата од 2 денари, откупната цена ќе достигне 15 денари за смедеревката и 17 за вранецот.
Финансиска помош е обезбедена и за винариите преку новата мерка за поддршка на произведено и извезено вино за периодот од 1-ви Септември 2021 до 1-ви Септември 2022 година. Корисници на овие средства се регистрираните производители на вино кои имаат производство и извоз.
Субвенцијата со оваа дополнителна мерка изнесува 2 денари по литар за наливно и 3 денари за литар вино во стаклена амбалажа.
Методија Трајков