Судскиот процес за струшката депонија заглави во Апелациски суд

Случајот со струшката депонија заглави на апелација. Веќе седум месеци се чека одлуката на Апелацискиот суд Битола, по поднесената жалба од страна на тужените, коишто струшкиот суд го прогласија за ненадлежен за ваков судски процес. Екологистите алармираат, велат проблемот со струшката депонија бара итно решавање, бидејќи изминативе пет години нема никакво подобрување на состојбите со управувањето со отпадот.

Нов еко-проблем во струшко е повеќекратното спалување на дивата депонија во село Лабуништа.

„Со самото пасивно постапување на Апелацискиот суд се губи смислата за итноста на овие мерки за коишто ние бараме да бидат имплементирани со цел заштита на здравјето и животот на луѓето“, вели Глигор Ќатоски застапник на Здружение на млади правници и екологист од НВО „Доста е“.

Загрижувачки се податоците од вештачењето направено од страна на реномирани експерти за последиците врз здравјето на луѓето. Изминативе пет години во струшко има значителен пораст на заболени од карцином и респираторни заболувања.

„Утврдено е дека депонијата влијае негативно прво ја загадува животната средина, а потоа негативно влијае врз здравјето и животот на луѓето. Показателите се дека имаме покачување на бројот на малигни заболувања, особено по спалување на депонијата во 2017-та година. Зголемување и компликации во бременоста, зголемување на респираторните болести и т.н.“, додава Ќатоски.

Со првата поднесена граѓанска тужба во земјава за загадувањето од струшката депонија тужени се Општина Струга, Јавното комунално претпријатие и Министерството за животна средина, кои меѓусебно си ја префрлуваат одговорноста за решавање на проблемот.

Соња Рилковска