За ВМРО-ДПМНЕ Ковачевски е трајно неспособен, тој одговори-само уплашени луѓе злоупотребуваат здравствен предизвик

Премиерот Димитар Ковачевски е трајно неспособен, дали лажел за да избегне војска или имаме неспособен човек за премиер, прашуваат во ВМРО-ДПМНЕ објавувајќи документ извадок од евиденциска книга на АРМ. Опозицискиот пратеник Драган Ковачки вели-или Ковачевски го злоупотребил влијанието на татко му кој тогаш бил градоначалник на Куманово и партиски функционер на СДС и добил лажно лекарско мислење, или тој навистина е трајно неспособен

„Ако лажел да избегне служење војска правејќи се трајно неспособен, тогаш не можеме ниту да претпоставиме за што сè друго би лажел. Доколку пак Ковачевски навистина е трајно неспособен, не знаеме дали таа состојба кај него прогресирала и дали тој е целосно функционален да ги извршува државничките задачи. И во двата случаи, односно и доколку лажел, и доколку е трајно неспособен, Ковачевски како премиер е опасност за државата“, изјави Ковачки.

Само нечесни и уплашени луѓе злоупотребуваат нечиј здравствен предизвик-е пишаниот став на премиерот Димитар Ковачевски. Не е изненаден, како што пишува во соопштението, од лагите, клеветите и манипулациите од ВМРО-ДПМНЕ.

„Никогаш ниту сум избегнувал ниту бегал од одговорноста за служење на воениот рок. Само нечесни и уплашени луѓе злоупотребуваат нечиј здравствен предизвик и последователна хируршка интервенција од пред 20 години за да го прикријат својот срам и криминал“, вели Ковачевски.

И додека премиерот Ковачевски ги посочува скандалите во Град Скопје како потврда дека ВМРО – ДПМНЕ не е реформирана, туку дополнително криминализирана, од опозициската партија, велат, Ковачевски мора да си даде оставка. Македонија не смее да биде водена од премиер кој е или патолошки лажго или е трајно неспособен.

Миле Ристески