Кризата не ги спречува големите инвеститори
Неколку домашни но и странски инвеститори се заинтересирани за парцели во кумановската индустриска зона. Од Општина Куманово велат и покрај големата економска криза, очекуваме развој на зоната. Во тек се преговори и со германскиот ланец супермаркети „Лидл“, за изградба на логистички центар. Компанијата „Дрекслермаер“ во новиот погон, за кој е издадена градежна дозвола, треба да обезбеди 1.500 нови работни места...
И покрај економската криза, големите стопански субјекти се заинтересирани за инвестиции во кумановската индустриска зона. Германскиот ланец на супермаркети, „Лидл“ интензивно преговара со Општина Куманово, на површина од 20 хектари да го изгради логистичкиот центар во зоната Новини и Речица. Општината веќе формирала работна група која работи на оваа инвестицијата. Доколку се реализира ќе се отворат 300 работни места.
Се обидуваме да изнајдеме начин во оваа локација да ги укрупниме парцелите, бидејќи се работи за огромна површина, некаде 20 хектари земјиште на коешто треба да биде изградена инвестиција од приближно 75 до 80 милиони евра, што верувам значително ќе значи за нас и за кумановското стопанство, истакна градоначалникот на Куманово, Максим Димитриевски.
Од општина Куманово информираат дека интерес за инвестиции во зоната има и од други компании. На последното јавно надавање продадени се парцели на двајца домашни и еден странски инвеститор. Цената е 15,7 евра по метар квадратен. Странската компанија веќе го изградила својот капацитет, останува општината да уреди патната инфраструктура. Би требало да се вработат околу 100 лица. Издадена е градежна дозвола и за изградба на нов погон на „Дрекслермаер“.
Има најава од нивна страна дека во првата тековна година ќе имаме 1.000 вработувања и веќе следната во 2023 година дополнителни минимум 500 или 1.500 вработувања, дополни Димитриевски.
Индустриската зона Новини и Речица се наоѓа на автопатот Е 75, кон границата со Република Србија. Се простира на површина од 65 хектари градежно земјиште, со намена Г2 (лесна и незагадувачка индустрија) и намена Б (големи трговски единици-шопинг молови и хотели). Засега функционираат неколку компании.
Елена Георгиевска