Почна распределбата на зелената нафта

Скоро 50.000 земјоделци од целата држава ќе добијат електронска картичка за набавка на дизел гориво за земјоделска механизација, а им следува не повеќе од 100.000 денари по земјоделско стопанство.

Обезбедени се вкупно 250 милиони денари, a субвенцијата е 50 проценти од трошоците за обработка на насадот на нивата.

Висината на поддршката зависи од видот на културата и големината на површината која е пријавена во барањата за финансиска помош. Корисници се полјоделците, овоштарите, лозарите и градинарите.

За пченица, јачмен, пченка,’рж, овес, ориз, тритикале, хељда и просо поддршката изнесува 1.400 денари по хектар.

За хмељ, лен, леќа, кикиритки, соја, сончоглед, маслодајна, шеќерна и добиточна репка, афион, памук, добиточен грашок и луцерка поддршката е 2.119, а за градинарските и лозовите култури 4.238 денари по хектар.

Во овоштарството субвенцијата изнесува 5.273, а за ореви и костени 2.636 денар и по хектар.

Картичката може да се користи повеќекратно се до исцрпување на средствата.

Методија Трајков